04
10.2015

【Halloween市集】好食好睇心思手作 @ D2 Place Monsters Unleashed

生活品味  
原來我已經半年沒有再逛D2 Place, 今個星期六, (103, 4), 二樓市集衰鬼變身哈佬喂嘉年華...
 
 
室內有Live Band, 有熱情, 有叫, 有笑, 好氣氛, 超正, 之不過...點解出面要打風? 打風可唔可以只發生星期五? 今日開始好鬼憎彩虹.

 

 
 
走入市集前, 一定要經過由豬頭哥哥看守的暗黑通道...豬頭哥哥:「快D, D...D行入去玩!!
 
 
大會有糖派, 就是珍寶蜘蛛糖有糖食, 阿囝最開心, 我問:「你唔驚咩?有隻蜘蛛黐係度」
 
 
阿囝:「我食粒糖之麻, 我又唔係食隻蜘蛛, 同埋假嘅...驚咩??(E家咁得戚!!)
 
 
 
終於買到LED mocktail, 燈泡做器皿, 我第一次在網上看到, 已經非常佩服這三位檔主的創意, 荔枝及菠蘿味, 不額外加啫喱, 售價$35. 
 
 
搶眼的東西, 一定多人鍾意, 所以即使飲品計起來不算便宜, 但依然人龍不絕...因為連我也覺得用$35, 就可以呃Like...超值呀!
 
 
究竟個燈泡除了可以給阿太伴影杯緣子之外, 我還可以怎樣循環再用好呢?
 
Raw心木紋的美
喜愛木的Eva:「我屋企8成嘅嘢都係木嚟架... 我份人好鍾意拗頸, 點解木一定只可以用嚟做枱枱凳凳喎, 無理由銀包,  電話殼只係得皮, 布造呀...咁我米試下用木囉」(大開眼界
 
 
木質地非常脆身, Eva注入特別成份, 令木質地可以變得較韌, 「係呀!你睇...就算我畀我隻狗仔OTTO咬足成晚, 個銀包都仲用得」(點解你會識加咩化學成份嘅? Eva:「因為我讀Science呀」哦!)
 
 
木系列是Eva半年前才開始製作, (最難係做邊款呀?), 「卡片套真係篤到手指痛, 因為有幾層呀, 對窿都真係好難對!, 其實Eva算是摩打手, 因為每件木製系列都只是花耗一小時便完成.
 
 
(全部你一個人做架?), 豪爽的Eva:「係呀!One Man Band, 不過我男朋友有畀意見...(咁都幾好喎)...佢最鍾意一路用一路彈囉」(彈者愛也, 即係我都成日彈我老婆一樣, 妳男朋友真係Sweet)
 
 
 
靚靚Pattern漁夫帽
Circle兼職手作布製漁夫帽有一年多, 「基本上我造D帽全部都係雙面, 布料除了係日本訂之外, 當然都會去深水埗揀布, 不過日本染色, Pattern各樣都真係靚好多...(日本乜都好團隊又多一名成員啦! Yeah!)
 
 
很喜歡戴帽的Circle, 原來未造帽之前, 是手作環保袋的, 當初因為她覺得香港出售的帽不夠特別, 於是激發起她自行製作
 
 
Circle:「係香港愈買得到, 就發覺嚟嚟去去都係個幾個牌子, 款色太清, 又唔獨特, 明明台灣, 日本都有人造, 點解香港唔得呢? 咁之前自己造環保袋都得, 帽應該都唔難, 於是便發展到E
 
 
(會唔會有趣事可以分享吓?) Circle好回味道:「試過係市集撞返以前中學老師, 佢仲幫我買咗頂帽添」, (不過, 你唔係啱啱今年畢業之麻??), Circle好開心:「唔係呀! 嘻嘻嘻」
 
 
未來Circle會用有機布料製作親子帽, BB...(乜原來布都有Organic?? 不過做親子袍一定有市場, 一賣就兩頂, 絶對做得過
 
 
愈醜愈攪笑
全職以自己故事創作插畫的阿Lui:「我大約年頭先開始以圍繞自己生活嚟畫畫, 其實之前我讀設計嗰陣, 其中一科就係插畫, 當初嘅工課就係LLH story 嘅雛型」
 
 
(你咁靚仔, 個公仔咁醜樣點會係你呀?), Lui:D人鍾意睇醜樣嘢多啲, 可以笑下麻」(咁又係...好似爵爵都係怪怪雞雞, 同樣好多人鍾意)
 
 
(全職畫插畫吃唔吃力?) 高大有型的阿Lui:「初初會有, E家出多咗不同產品, 就好咗D, (邊樣嘢最多人買?), PostCard最多, 因為夠生活化, 又平...(E家啲人都好少人寫信), 所以我遲D會出聖誕卡, 生日卡囉」
 
 
Lui表示, 上次在淺水灣市集很灰,「因為天氣唔好, 同埋主要係外國人...(係呀!鬼佬梗係唔識睇中文啦), 所以反應唔係太理想」, 無問題, 你的插畫很搶眼, 我剛才遠遠都被LLH吸引到過來, 所以你應該會愈來愈受歡迎.
 
 
 
公仔曲奇有冇得試?
San與數位朋友合作造曲奇,(有冇咩主打款式?), San:「我哋主要造薑餅屋, 公仔曲奇為主,  有時間可以過嚟億利我哋面市睇睇」
 
 
即場沒有公仔曲奇試食, 不過就有朱古力杏仁片, Oreo, 及鬆餅, 不會太燶, 太乾, 又沒有太油膩...有時間我會去你門市睇睇.
 
 
皮氣夠靚
酒壺是阿Luke的最新創作, (你好鍾意飲酒?), Luke:「因為前排跟朋友到日本玩, 途中他買了一支碧咸威士忌, 支酒又送個酒壺, 係佢提議我不如做個皮套, 咁我米試下囉」(咁如果碧咸攞住又真係好型喎)
 
 
(最多客人買啲咩呢?), 2012年正式與朋友成立Chubility的阿Luke,:「外國客鍾意買結他Pick, (點解呢?), 我估可能外國玩樂器嘅人比較多掛」
 
 
全檔最有趣一定是一系列大大細細的皮革啷啷, 「因為上年見網上有人造, 第一眼見到得意, 於是就即刻學整, 本來個模係成個圓形嚟嘅, 感覺唔太似啷啷, 所以我調校過弧度, E家係上細下大, 靚啲啦! 
 
 
 
(你的皮色好系列化, 而且特別光澤?) Luke,:「因為啲皮嘅顏色係我自己染, 同搽定色濟, 咁我可以買死同一款原色牛皮, 厚度質量米一定統一囉, 最重要個倉太細, 唔夠位放唔同顏色嘅皮呀!
 
  

 

全場最型就是這位Henna師傅...我想跟他聊天, 原來他用膠紙封住自己嘴巴, 而他又表示沒有卡片, 我好想知, 13:00-20:00 咁點食飯?
 
 
 



大仁生活facebook

發表於2015.10.04
留言(0)
博客名稱 :
大仁生活
網誌名稱:
大仁生活
使用天數:2,418
性別:
按月份瀏覽
    2020
  • 一月
  • 二月
  • 三月
  • 四月
  • 五月
    2019
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
  • 十月
  • 十一月
  • 十二月
>> 更多
系統分類
  • 美容時尚
  • 飲食烹飪
  • 環球旅遊
  • 親子育兒
  • 數碼科技
  • 生活品味
  • 藝文創作
  • 電影戲劇
  • 寵物日誌
  • 攝影寫真
  • 星座算命
  • 戀愛心情
  • 文化政經
  • 其他
自行分類
最新留言