09
08.2018

【親子好去處】大澳文物酒店 Tai O Heritage Hotel #CheckinTaiO親子住宿計劃

環球旅遊   親子育兒(旅遊)  

去大澳次數唔多,但就每次去都好想入住大澳文物酒店,今個暑假終於一家人入去住咗晚,整個旅程只可以用兩個字嚟形容「輕」同「慢」,因為酒店暑期全新推出的#CheckinTaiO親子住宿計劃,真心住得舒服玩得輕鬆。

 

 

 

我哋一家最鍾意去人少的地方,因為可以真真正正一家享受親子時光,避免排隊之苦,或者跑Schedule之累。好似大澳呢個地方,我哋特別鍾意,雖然假日人多,不過如果揀啱時間同埋識行,都係可以好自在。

 

而我一直都好想入住大澳文物酒店,話哂大澳都叫「東方威尼斯」,今個暑假酒店首次推出 「#CheckinTaiO親子住宿計劃」,經過呢兩日一夜,我夠膽話今次旅程超舒服開心,值得推介係大家。(包無介紹錯)

 

 

其實去大澳文物酒店好簡單,如果由水路去大約3分鐘就到,每位$10,去到最出名的藍色橫水渡大橋位置就會見到有得搭。

 

陸路就可以過埋吊橋行到去匯豐ATM位置轉左,見到大澳街巿繼續直行,入去村路直走大約20分鐘就到。(文末會有相介紹)

 

 

哥哥同芊芊好興奮可以坐喺船頭欣賞靚景,不過艇仔離開咗大澳巿中心後,就要番埋去船座位上坐,因為之後艇仔會加快速度。

 


哥哥一邊望住好靚嘅棚屋群,芊芊就一邊食緊西北風。

 


話咁快就到咗碼頭,喺艇上面影上去文物酒店,真係好有古堡Feel。

 


今日天氣超好,藍天白雲靚到冇人有,不過順便一提,雖然岸邊有小沙灘,但都唔係咁適合游水,好多沙石同貝殼容易割損手腳。


 

反而呢個位置欣賞日落係最正,仲靚過喺大澳碼頭嗰邊嘅海濱長廊喔!

 

 

#CheckinTaiO親子住宿計劃包括:-

 

- 入住酒店特級雙人床房一晚連Tai O Lookout精選家庭式共享早餐及晚餐(2位成人及1位小童) - 大澳文物酒店索繩背包,附送繪畫簿及木顏色筆 

- 貝殻相框工作坊 

- 大澳文物酒店導賞及乘坐小艇欣賞漁村景色 

- 到棚屋細聽大澳居民分享漁村歷史及生活點滴 

- #CheckinTaiO 工作紙及尋蹤遊戲,沿着地圖遊覽大澳10大打卡點 

- 完成整個旅程的小朋友將獲頒大澳文物酒店證書及紀念品一份

 


正常3點鐘到達先去Check-in,我哋就早咗到達先放低行李。


大澳文物酒店前身係舊大澳警署,已經有116年歷史,今活化成為眼前好重古典味道的酒店,身處呢個地方,都立即覺得時間停頓咗,感覺要慢慢的享受細味每個體驗。


舊大澳警署建於1902年,被評為二級歷史建築,因為當時香港係英國殖民地,所以有好重19世紀晚期古典建築嘅特色。

 

 

 

舊大澳警署由三個部份組成:一座兩層高的主樓及附屬建築,同埋後期增建的一層高樓房,都係典型的殖民地風格建築。

 

 

所謂活化即係盡量保留番舊有建築,復修重整時,妥善保留了大炮、探射燈、看守塔、儲物室及泥封已久的地堡等特色。

 

好似呢個Reception接待處,前身係報案室嚟架,仲有兩個覊留室「臭格」用嚟囚禁罪犯。

 

芊芊話「有請!」

 


當年舊大澳警署的警察歸水警管轄,所以哥哥戴起寫上「Marine Police」字的帽同警棍扮差人,BTW點解扮犯人的都咁開心,哈哈~~

 

 

Check-in時小朋友會獲派發一袋小禮物,裡面有工作紙、尋蹤遊戲、繪畫簿及木顏色筆。

 


因為我哋比較早到,所以先上去餐廳食個Brunch(註:不包括於住宿計劃內)。



餐廳位於二樓,前身只係俾警員用嚟掠衫的天台,今已改建成全玻璃的優雅餐廳喔!



點解餐廳名叫"LOOKOUT",因為前身這裏有兩個看守塔, 作水警監視海盜之用,所以就為今日餐廳嘅名字。


 

全玻璃的建築配合日光照射,令整間餐廳都非常光猛而不曬(因為窗外方向對正南面),係全天然的環保設計。

 


仲有幾把吊扇同一部鋼琴,令餐廳額外增加唔少古典味。

 


坐近窗口位置,可以飽覽成個無敵大海景,真係無得輸。

 


唔好以為只係睇得,呢度食物質素都好高,價錢跟一般酒店餐廳差唔多,但講到尾最緊要好食。

 

 


等侯食物期間,小朋友安安靜靜的畫畫,大人就可以輕鬆自在地享受悠閒時間。

 


呢杯係用上大澳特產的「紫貝天葵蘋果」飲品,咁熱天氣飲落去真係透心涼,酸酸甜甜,感味道有D似洛神花茶配上蘋果汁,感覺好Fresh,值得一試。

 


點了好幾個美食喔!心心眼...超好味係蝦醬雞翼,另外有蝦醬豬扒飽同一品炒飯,炒飯夠乾夠爽,兩個食到一粒飯都冇剩。仲有同樣用上紫貝天葵的雞蛋仔配雪糕,都好有風味。

 

 

但係最吸引都係....雪糕!睇嚟廚師哥哥以後諗兒童餐唔駛咁頭痛。

 


住宿計劃的行程非常輕鬆,只有下午4:00有一個「貝殻相框工作坊」,務求令所有入住家庭享受這裏的環境,而唔係匆匆忙忙的跑景點,真正享受親子時光。


我哋先到「羈留室」拎番行李入房。整個酒店只有9間大小不同的房間,我哋入住嘅係「特級雙人床客房」


 

房間內全以粉藍色及白色為主調,設有兩張雙人床、一張書枱同埋有個梳化Corner,最適合一家人夜晚喺度玩下Board Game睇吓電視。

 


 

 

 

 

 

同一般酒店一樣,都附有小雪櫃,有各樣收費飲品。

 


仲有部Capsule機,可以俾咖啡精第朝飲杯醒晨咖啡。(免費)

 


房間牆上都掛滿好多舊大澳特色風情照片。


 

浴室唔好講笑...係超大! 跟房間一樣寛闊。

 


浴缸跟淋浴花灑裝置同一空間,如果要幫小朋友沖洗肯定唔會逼。

 

 


所有設備感覺跟一般酒店好不一樣,充滿優雅氣色。

 


我最鍾意浴缸的花灑﹐佢好像舊式電話聽筒安放着。

 

 

工作坊未開始,我哋先喺酒店附近周圍逛逛打打咭,十分優閒。

 

 


酒店外圍有好多休憩位置,如果幾個家庭入住,最適合一齊坐低吹吹水。

 


酒店旁邊有小樓梯行上這個像小樓台的位置,可吹吹涼風休息一下。

 


由小樓台望向酒店餐廳位置。

 


另外酒店房間外有一小荷花池,亦都係打咭好位置。

 


 

其實酒店都係對外公眾開放,巿民可以於早上11點至下午6點上來參觀。

 


酒店建築以至一房一門,邊D係保留舊有建築,邊D係全新設計安置嘅呢?大家嚟到都不妨同小朋友玩個小遊戲估一估。



我希望帶小朋友嚟唔單只係入住一晚咁簡單,希望都俾佢哋認識一下歷史文化,同埋大澳魚村風俗人情。

 

 

 

 

同佢哋兩個散過步後,就上到餐廳對開的戶外位置,開始「貝殻相框工作坊」

 


兩個一向都好鍾意做小勞作仔,見到咁多唔同顏色嘅彩石,對眼好似發哂光咁。


 


職員先同我哋喺酒店範圍影相,然後立即打印出嚟同設計相框。

 

 


 

在不匆不忙的時間內完成咗自己的心愛相架啦!(而且幸好佢哋都唔係鍾意同一張相...呵呵~)

 

 

完成後番房休息一下(竟然還可以有1小時多可以來個小睡),然後睇過天文台資料,我哋大約7:00先至落到去碼頭睇日落。

 


雖然多雲,不過隱約都欣賞夕陽的美。BTW 哥哥同芊芊問「幾時可以番入房呀...」(掃興兒童)

 


佢哋眼中只係望到遠處的飛機同船隻...(無奈)

 


入夜後,酒店四圍亮起燈來都非常美喔!


 

我哋番房沖個靚涼,再上去食晚餐。芊芊問點解咁少人...(因為我哋好夜先上嚟食!哈哈~)

 

 

幸好餐廳營業到10點,我哋還係可以悠閒咁享受晚餐。

 


我哋分別點了兩個兒童餐及一份大人晚餐同一份BBQ餐。

 

 

 

 

 

 


味道都好好,加上呢個安靜環境,真心食得舒服。

 


食到飽飽之後,細路就入房玩同睇電視,我去咗邊....我好興奮喺房外面捕星星呀,真係在零光害之下,居然喺香港都可以睇到咁多星星,連我自己都嚇咗一跳。

 


本來都識睇少少星座,但係依家咁多粒我反而唔知邊粒打邊粒,哈哈~~~

 

 

影咗我成粒鐘,番到入房佢哋仍然睇緊ANGRY BIRDS!

 


請問呢個係咩姿勢?乜咁樣睇電視舒服咩?

 


到咗第二朝自然醒...真係好耐未試過,然後「脂油淡定」上去餐廳嘆早餐。

 

 

超豐富的早餐配搭。

 

 


仲有個奄列配炸薯餅 Yummy Yummy!

 


食過早餐之後,我哋就一齊拎住工作紙玩尋蹤遊戲,由土生土長的大澳原居民Alvin哥哥(保育主任)帶住我哋,介紹舊警署活化前後的各大景點。

 


原來這個探射燈除咗水警用嚟監察海面情況,仲特別用嚟照射防止偷渡客入境。

 

 

 

就在餐廳對外(即工作坊的位置)有着一個看守塔,不過因為呢度好多蚊,所以聽講話邊個警察唔聽話就要駐守呢個位置當徵罰之用。

 

 

 


 

呢個係復修後仍保留嘅大砲遺址,聽Alvin哥哥講原來佢都唔算得上大砲,只係起阻嚇作用吧。

 

 

整個導賞也只不過半個鐘,唔駛怕小朋友冇耐性聽,恰到好處!然後跟住我哋就離開酒店,坐小艇觀光同到棚屋原住民家參觀。

 

 

在兩邊棚屋中間穿過,風景真係好靚,打咭打到我手軟。

 

 

 

我哋上到其中一戶棚屋居民來敏叔家,細小的木橋,兩旁的鐵皮寮屋,全係大澳棚屋的傳統特色。

 

 

 

一去到人家睇見有張吊椅,就走埋去當佢韆鞦咁坐,真係好失禮...

 

 


我哋大家都同樣有一個疑問,點解支撐住棚屋的木咁堅固,打風落雨水浸都仍然唔欄,原來佢哋就係用緊呢一隻木材 - 坤甸木,呢種木頭係來自百年漁船的骨幹,就連「新基橋」都係用呢款木材建造。

 

 


芊芊影呢相嗰陣頂唔到好耐,因為塊木頭都幾重架!

 


仲有唔好睇少呢條木路軌,當打風落雨嗰陣用嚟趟門,就算打住10號波都擋得住。

 


逗留咗大約半個鐘,然後就開始到大澳10大打卡景點玩尋蹤遊戲!

 


我哋預先打開地圖,同小朋友看看整個大澳巿的各打咭位置。

 

 

 

跟住Alvin哥哥仲帶我哋到沙仔面的一個隱秘景點打咭,佢話好多入嚟大澳的朋友都唔會發現呢個位置,因為佢哋都以為係原居民的居住範圍唔敢入去。

 


沿住木橋行入去,見到「三涌北」同「沙仔面」的小標記。

 

 


一直向沙面仔方面進入,穿穿插插木橋小路。



看見前面藍色的木棚,就係打咭景點所在。


 

喺呢度可以離遠望向「新基大橋」,小朋友可以提前打咭,將貼紙貼在工作紙上。

 

 


風景真係好靚,幸好可以到此一遊。

 

 

 

天氣真係太熱,我哋途中經過棚屋屋主的舖頭,幫襯婆婆買咗幾支地道飲品,佢用咗桃膠配合雪梨、檸檬、黑加侖子、芒果等,做成好解渴嘅飲品。

 

 


大家如果到大澳遊都記住嚟「來敏記」幫襯買番支呀!

 


然後我哋再到藍色橫水渡大橋,大澳最出名嘅打咭點喔!

 

 


永安街周圍都會見到海味店,都係大澳最著名的特色。


咁大條鯊色皮...Amazing

 

 


去過大澳的朋友,應該都實見過呢D曬乾咗嘅雞泡魚。

 


芊芊未見過咁大舊冰,即刻超開心不停摸。

 


就算唔係工作紙上的打咭點,都好值得打咭喔!(我最愛呢類特色小店)


 

另外大澳最出名的滷水大墨魚,大家又試過未呀,真係好爽好入味架!

 

 

 

由於有天后誕活動,所以廣場搭咗棚架。

 


大家又有冇試過地道的「蝦豬餅」呀,個名咁得意,原來係「Husband」譯過嚟。

 

 

 

 

 

 


大澳另一家最出名嘅沙翁店,不過今日太熱...就唔試住喇!

 

 


終於去到新基橋啦!喺橋上面可以睇到橋底好多彈塗魚同埋小蟹。

 

 

 

 

 

只剩3個打咭景點,中途我哋就小休一下,去嘆馳名嘅豆腐花。

 


我哋坐喺外面吹住涼風食住冰凍豆花,真係好正!

 

 

 

最後我哋去到大澳街巿附近的小路,準備到大會堂及蝦醬廠景點

(即係開頭曾講過可以由陸路行入去酒店的這個位置)

 

 

沿途見到更多風土人情,曬鹹蛋曬鹹魚幾乎家家都有。

 

 


行大約5-8分鐘就到大澳大會堂,旁邊更有個兒童遊樂場。


 

 

今日天氣實在太熱,行下行下我哋中途站又補充下體力食個冰菠蘿同冰西瓜。

 

 


再行前少少已經傳嚟一陣陣蝦醬味。


 

繼續再往前行,幾乎到大澳文物酒店,就會見到「勝利香蝦廠」,喺酒店食到嘅蝦醬炒飯同雞翼嘅蝦醬,就係出產自「勝利香」架啦!

 

 

 

 

我哋都幫襯買咗2樽蝦醬番去送俾婆婆同嫲嫲。

 

 

 

最後往前行多2分鐘就番到酒店,休息一下再取回行李同證書,坐艇仔番去巴士總站離開啦!(可以叫酒店代勞Call艇)

 

 

 

 

Photo by Sony A7III FE 28mm F/2

 

想跟我去體驗其他活動,快D報名親子團,同埋留意專頁公佈詳情啦!

http://goo.gl/forms/CNZMEPoMIWkouK8o2

 

呀劍評分: 10

 

呀劍評語: 絕對係一個輕鬆住宿體驗之旅,由Check-in至離開,每一個行程都充份俾住客真真正正的休息,而且可以在旅程中又認識到大澳歷史文化,亦都可以話係一個學習之旅。


而且無論由大澳的大街小巷至酒店古舊建築,都充滿風土人情,絕對係打咭首選。


職員上下都服務細心,態度友善,我真係要打個滿分。

 

地址

香港大嶼山大澳可仔埗街


推廣日期

即日至9月2日止


收費

$2580起


兩日一夜的精彩行程包括下列項目

- 入住酒店特級雙人床房一晚連Tai O Lookout精選家庭式共享早餐及晚餐(2位成人及1位小童)

- 大澳文物酒店索繩背包,附送繪畫簿及木顏色筆

- 貝殻相框工作坊

- 大澳文物酒店導賞及乘坐小艇欣賞漁村景色

- 到棚屋細聽大澳居民分享漁村歷史及生活點滴

- #CheckinTaiO 工作紙及尋蹤遊戲,沿着地圖遊覽大澳10大打卡點

- 完成整個旅程的小朋友將獲頒大澳文物酒店證書及紀念品一份


交通

前往大澳文物酒店之交通安排:

1. 由香港國際機場出發:乘坐S線穿梭巴士往東涌,車程約15分鐘,然後於鄰近東涌地鐵站的東涌市中心巴士總站轉坐11號巴士往大澳,車程約50分鐘

2. 由香港中環出發:於中環6號碼頭乘坐高速船至梅窩,船程約35分鐘,然後於梅窩碼頭巴士總站乘坐1號巴士往大澳,車程約55分鐘

3. 由屯門出發:於屯門碼頭乘坐渡輪前往大澳,並途經東涌及沙螺灣之渡輪,船程約60分鐘。抵達大澳後,可乘坐2分鐘的快艇或由大澳巴士總站步行約20分鐘前往酒店。


備註:大澳文物酒店不設泊車設施。另外,東涌道(石門甲道以南)及嶼南的所有道路已被劃設為封閉道路,任何人士如需駕駛車輛進出東涌道及嶼南的道路,必須持有由運輸處發出的有效「大嶼山封閉道路通行許可證」,並遵照封閉道路通行許可證上所載的使用條件。 抵達大澳後,可乘坐2分鐘的付費快艇*或由大澳巴士總站步行約20分鐘前往酒店。 *服務須視乎實際情況而定 (一般為早上11時至下午5時) 如在交通安排上有任何需要,歡迎致電+852 2985 8383與我們聯繫。


Image - transportation


預約電話

2985 8008


官方網站

https://www.taioheritagehotel.com/tch/homepage/Homepage.html

 

(以上資料更新至文章當日)

 

 

Facebook專頁: 呀劍萬帥 kimfamilytravel

 

Blog網誌 : www.kimfamilytravel.com

 

 

                 

發表於2018.8.09
留言(0)
博客名稱 :
呀劍萬帥
網誌名稱:
呀劍萬帥 • 親子旅遊 • 攝影札記
使用天數:921
年齡:2
電郵:kimfamilytravel@yahoo.com.hk
按月份瀏覽
    2018
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
  • 十月
    2017
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
  • 十月
  • 十一月
  • 十二月
>> 更多
系統分類
  • 美容時尚
  • 飲食烹飪
  • 環球旅遊
  • 親子育兒
  • 數碼科技
  • 生活品味
  • 藝文創作
  • 電影戲劇
  • 寵物日誌
  • 攝影寫真
  • 戀愛心情
  • 文化政經
  • 其他
  • 台灣館
自行分類